ഐപിഎല്ലിൽ ടീമുകൾക്ക് പ്ലേ ഓഫ് സാധ്യതകൾ ഇനി എങ്ങനെ?; ഓരോ ടീമുകളും എത്ര മത്സരം വിജയിക്കണം

ഇന്ത്യൻ പ്രീമിയർ ലീ​ഗിൽ പ്ലേ ഓഫ് പ്രതീക്ഷകൾ സജീവമാക്കുകയാണ് ഓരോ ടീമുകളും. എന്നാൽ പോയിന്റ് ടേബിളിൽ അവസാന സ്ഥാനത്തുള്ള ടീമുകൾക്ക് ഇനി പ്ലേ ഓഫ് സാധ്യതകൾ ഏറെ ബുദ്ധിമുട്ടാണ്. പോയിന്റ് ടേബിളിന്റെ അടിസ്ഥാനത്തിൽ ഓരോ ടീമിന്റെയും പ്ലേ ഓഫ് സാധ്യതകൾ പരിശോധിക്കാം. ഐപിഎല്ലിൽ ഓരോ ടീമിനും 14 മത്സരങ്ങൾ വീതമാണുള്ളത്. ഓരോ വിജയത്തിനും രണ്ട് പോയിന്റ് വീതം ലഭിക്കും. എട്ട് മത്സരങ്ങൾ വിജയിക്കുന്ന ടീമുകള്‍ക്ക് 16 പോയിന്റ് സ്വന്തമാക്കി പ്ലേ ഓഫ് യോ​ഗ്യത ഏറെക്കുറെ ഉറപ്പിക്കാൻ കഴിയും.

നിലവിൽ പോയിന്റ് പട്ടികയിൽ ഒന്നാമതുള്ള ടീം ​ഗുജറാത്ത് ടൈറ്റൻസ് ആണ്. എട്ട് മത്സരങ്ങളിൽ നിന്ന് ആറ് ജയങ്ങളാണ് ഗുജറാത്ത് നേടിയിട്ടുള്ളത്. 12 പോയിന്റും ​ഗുജറാത്ത് സ്വന്തമാക്കി കഴിഞ്ഞു. രണ്ട് വിജയങ്ങൾ കൂടി നേടിക്കഴിഞ്ഞാൽ ​ഗുജറാത്ത് ടൈറ്റൻസിന് പ്ലേ ഓഫ് ഉറപ്പിക്കാം. ​ഗുജറാത്തിന് സമാനമാണ് ഡൽഹി ക്യാപിറ്റൽസിന്റെ സ്ഥിതിയും. എട്ട് മത്സരങ്ങളിൽ നിന്ന് ആറ് വിജയങ്ങളാണ് ഡൽഹിക്കുള്ളത്. രണ്ട് വിജയങ്ങൾ കൂടി നേടിക്കഴിഞ്ഞാൽ ​ഡൽഹി ക്യാപിറ്റൽസിന് പ്ലേ ഓഫിലേക്ക് കടക്കാം.

പോയിന്റ് ടേബിളിൽ മൂന്നാമതുള്ള റോയൽ ചലഞ്ചേഴ്സ് ഒമ്പത് മത്സരങ്ങളിൽ ആറ് വിജയങ്ങൾ നേടിക്കഴിഞ്ഞു. 12 പോയിന്റുള്ള ആർസിബി ഇനി നാല് പോയിന്റ് നേടണം. അതിനായി രണ്ട് വിജയങ്ങൾ സ്വന്തമാക്കണം. ഒമ്പത് മത്സരങ്ങളിൽ നിന്ന് 10 പോയിന്റാണ് മുംബൈ ഇന്ത്യൻസിന്റെ സമ്പാദ്യം. അതായത് അഞ്ച് ജയവും നാല് തോൽവിയും. ഇനിയുള്ള അഞ്ച് മത്സരങ്ങളിൽ മൂന്ന് വിജയങ്ങൾ നേടിയാൽ മുംബൈയ്ക്ക് പ്ലേ ഓഫ് പ്രതീക്ഷകൾ സജീവമാക്കാം.

എട്ട് മത്സരങ്ങളിൽ നിന്ന് അഞ്ച് ജയമുള്ള പഞ്ചാബ് കിങ്സിന് ഇനിയുള്ള ആറ് മത്സരങ്ങളിൽ മൂന്ന് എണ്ണം വിജയിക്കാനായാൽ പ്ലേ ഓഫ് സാധ്യതകളുണ്ട്. സമാന സ്ഥിതിയാണ് കൊൽക്കത്ത നൈറ്റ് റൈഡേഴ്സിനുമുള്ളത്. അവശേഷിക്കുന്ന ആറിൽ മൂന്ന് ജയങ്ങൾ കൊൽക്കത്ത നേടേണ്ടതുണ്ട്. ലഖ്നൗ സൂപ്പർ ജയന്റ്സിന് ഒമ്പത് മത്സരങ്ങളിൽ അഞ്ചിൽ വിജയിക്കാൻ സാധിച്ചു. ഇനിയുള്ള അഞ്ച് മത്സരങ്ങളിൽ നാലില്‍ വിജയം നേടിയാൽ ലഖ്നൗവിന് പ്ലേ ഓഫിലെത്താം.

പോയിന്റ് ടേബിളിൽ എട്ടാമതുള്ള രാജസ്ഥാന് ഇനി കാര്യങ്ങൾ എളുപ്പമാകില്ല. നിലവിൽ ഒമ്പത് മത്സരങ്ങൾ പിന്നിടുന്ന രാജസ്ഥാന് രണ്ട് ജയം മാത്രമാണുള്ളത്. അവശേഷിച്ച അഞ്ച് മത്സരങ്ങളും വിജയിച്ചാലും 14 പോയിന്റേ നേടാനേ സാധിക്കൂ. ഇങ്ങനെ സംഭവിച്ചാലും രാജസ്ഥാന് പ്ലേ ഓഫിലെത്തണമെങ്കിൽ മറ്റ് ടീമുകളുടെ ഫലങ്ങളെ ആശ്രയിക്കണം. പോയിന്റ് ടേബിളിൽ ഒമ്പത്, പത്ത് സ്ഥാനങ്ങളിലുള്ള സൺറൈസേഴ്സ് ഹൈദരാബാദ്, ചെന്നൈ സൂപ്പർ കിങ്സ് ടീമുകൾക്ക് ഇനിയുള്ള എല്ലാ മത്സരങ്ങളിലും വിജയിച്ചാൽ മാത്രമെ പ്ലേ ഓഫിലെത്താൻ സാധിക്കൂ. ഇരുടീമുകൾക്കും എട്ട് മത്സരങ്ങളിൽ രണ്ട് വിജയം മാത്രമേ നേടാൻ സാധിച്ചുള്ളൂ.

Content Highlights: Team chances to playoff according to IPL Points Table 2025